Ten Lions Mob Had Three Cattle Antidote

18-11-2012
Ten Lions Mob Had Three Cattle Antidote
Divya Bhaskar
http://www.divyabhaskar.co.in/article/SAU-ten-lions-mob-had-three-cattle-antidote-4053831.html?OF17=

વાઘણીયામાં દસ સાવજના ટોળાએ કર્યું ત્રણ પશુનું મારણ

- ગામના પાદર સુધી સાવજો ચઢી આવતા લોકોમાં ભાગદોડ : એક ગાયને ઘાયલ કરી દીધી


લીલીયા તાલુકામાં રેવન્યુ વિસ્તારમાં સાવજોની સંખ્યા સતત વધતી જ જાય છે. જેને પગલે આ સાવજો દ્વારા મારણની ઘટનાઓ પણ અવાર નવાર બને છે. આજે લીલીયા તાલુકાના વાઘણીયા ગામની સીમમાં એક સાથે દશ સાવજના ટોળા દ્વારા ત્રણ પશુનું મારણ કરવામાં આવ્યુ હતું. એટલુ જ નહી એક ગાયને ગંભીર રીતે ઘાયલ કરી દીધી હતી. બનાવની જાણ થતા વન વિભાગનો સ્ટાફ અહિં દોડી ગયો હતો. મારણની આ ઘટના લીલીયા શહેરથી છ કીમી દુર આવેલા વાઘણીયા ગામની સીમમાં બની હતી.


ગામની સીમમાં પાછલા કેટલાક સમયથી સાવજોનો વસવાટ છે. આજે એક સાથે દસ સાવજોનું ટોળુ છેક ગામના પાદર સુધી ધસી આવ્યુ હતું અને ત્રણ પશુનું મારણ કર્યુ હતું. વન વિભાગના સુત્રોમાંથી જાણવા મળતી વિગત અનુસાર વાઘણીયા ગામના મેપાભાઇ લખમણભાઇની એક ગાય તથા દેવશીભાઇ રૂડાભાઇ અને મંગાભાઇ લક્ષ્મણભાઇના એક એક વાછરડાને સાવજના આ ટોળાએ ધોળા દિવસે ફાડી ખાધા હતાં.


આ ઉપરાંત સાવજના ટોળાએ મંગાભાઇની એક ગાયને ગંભીર રીતે ઇજા પહોંચાડી હતી. અહિં લોકોનું ટોળુ પણ એકઠુ થઇ ગયુ હતું. બનાવની જાણ થતા આરએફઓ એ.કે. તુર્ક સ્ટાફના બી.એમ. રાઠોડ, કે.જી. ગોહિ‌લ, બીપીનભાઇ ગોહિ‌લ અને પ્રફુલભાઇ મહેતા ઘટનાસ્થળે દોડી ગયા હતાં અને કાગળ પરની જરૂરી કાર્યવાહી હાથ ધરી હતી.


આ વિસ્તારમાં એક સાથે આટલા સાવજોના કારણે ગામલોકોમાં ભારે ફફડાટ જોવા મળી રહ્યો છે. દરમીયાન સાવજોનું આ ટોળુ મોડી સાંજે પણ ફરી છેક ગામના પાદર સુધી આવી ચડ્યુ હતું. જેને પગલે ગામલોકોમાં ભાગદોડ મચી ગઇ હતી.