Leopard cub killed at Karamdadi near Dhari

01-11-2012
Leopard cub killed at Karamdadi near Dhari
Divya Bhaskar
http://www.divyabhaskar.co.in/article/SAU-people-killed-panther-cub-in-dhari-3993956.html

ઉશ્કેરાયેલા લોકોએ દીપડાના બચ્ચાંને મારી નાખ્યું

- સવારે દીપડાએ ખેડૂત પર હુમલો કરતાં લોકો વિફર્યો હતા
- ચાર માસના બચ્ચાંને માથામાં બોથડ પદાર્થ મારતાં મગજ બહાર આવી ગયું : વન ખાતાના અધિકારી દોડ્યા

ધારી તાલુકાના કરમદડી ગામની સીમમાં આજે સવારે ખેતીકામ કરતા એક યુવાન પર દપિડાએ હુમલો કર્યાની ઘટના બન્યા બાદ મોડી સાંજે આ યુવકની વાડીમાંથી એક દિપડીના બચ્ચાનો હત્યા કરાયેલો મૃતદેહ મળી આવતા વન વિભાગના અધિકારીઓ તાબડતોબ ઘટનાસ્થળે દોડી ગયા હતાં. દિપડાના હુમલા બાદ તેના બચ્ચાને ઉશ્કેરાયેલા લોકોએ બોથડ પદાર્થથી પતાવી દીધુ હોવાનું માનવામાં આવી રહ્યુ છે.

દપિડીના બચ્ચાને મારી નાખવાની આ ઘટના ધારી તાલુકાના કરમદડી ગામની સીમમાં બની હતી. કરમદડી ગામના જયસુખભાઇ રત્નાભાઇ ખીમાણીયાની વાડીમાંથી આશરે ચાર માસની દિપડીનો મૃતદેહ મળી આવ્યો હતો. વાડીમાં મૃતદેહ હોવાની જાણ થતા ધારીના ડીએફઓ અંશુમન શર્મા, એસીએફ મુની, આરએફઓ એ.વી. ઠાકર વગેરે સ્ટાફ સાથે ઘટનાસ્થળે દોડી ગયા હતાં.

વન વિભાગના સુત્રોમાંથી જાણવા મળતી વિગત અનુસાર આશરે ચાર માસની ઉંમરના આ બચ્ચાના શરીર પર ઇજાના નિશાનો હતા. બચ્ચાના માથા પર ક્રુરતાથી બોથડ પદાર્થ મરાતા તેનું મગજ પણ બહાર નિકળી ગયુ હતુ, નાક, કાનમાંથી લોહી વહી ગયુ હતું. જેને પગલે બે ડોક્ટરની પેનલથી ધારીના ભુત બંગલા ખાતે પોસ્ટ મોર્ટમ કરવા મોડી રાત્રે તજવીજ હાથ ધરવામાં આવી હતી.

અત્રે ઉલ્લેખનીય છે કે આજે સવારે કરમદડી ગામે વાડી માલીક જયસુખભાઇ રત્નાભાઇ ખીમાણીયા પર દિપડાએ હુમલો કર્યો હતો. દપિડાએ તેમને માથાના ભાગે ઇજા પહોંચાડતા સારવાર માટે દવાખાને ખસેડાયા હતાં. આ ઘટનાને પગલે ઉશ્કેરાઇને કોઇએ દિપડીના બચ્ચાને મારી નાખ્યુ હોવાનું માનવામાં આવી રહ્યુ છે. વનતંત્રએ ઝીણવટભરી તપાસ હાથ ધરી છે.