Pride of 7 lions kill 8 cows inside Jeera village near Dhari

17-08-2012
Pride of 7 lions kill 8 cows inside Jeera village near Dhari
Divya Bhaskar
http://www.divyabhaskar.co.in/article/SAU-hunt-of-eight-cows-by-lions-3657151.html?PRVNX=

ગામની શેરીઓમાં રખડતી ગાયો પર સાત સાવજો તૂટી પડ્યા

- ધારીના જીરા ગામે સાવજોનો આતંક આઠ ગાયોને ફાડી ખાધી
- લોકોમાં ભયનો માહોલ સર્જાયો

ધારી ગીરપુર્વના જીરા ગામે બુધવારની વહેલી સવારે સાત ડાલામથ્થા સાવજો ગામમાં ઘુસી આવ્યાં હતાં અને ભારે આતંક મચાવ્યો હતો. ગામમાં રખડતી આઠ ગાયોને આ સાવજોએ ફાડી ખાધી હતી. ગામમાં એકસાથે સાત સાવજો ઘુસી આવતા લોકો થરથરી ઉઠ્યાં હતાં.

ગીરકાંઠાના ગામોમાં અવારનવાર જંગલમાંથી સિંહ તેમજ દીપડાઓ ઘુસી આવીને દુધાળા પશુઓના મારણ કરે છે. આ ઉપરાંત માનવ પરના હુમલાની ઘટનાઓ પણ વધી રહી છે ત્યારે બુધવારની સવારે એક્સાથે સાત સાવજો બચ્ચા સાથે જીરા ગામમાં આવી ચડ્યા હતા અને શેરીઓમાં લટાર મારી હતી.

આ સાત સાવજોએ ગામમાં આઠ ગાયોને ફાડી ખાધી હતી અને મિજબાની માણી હતી. ગામમાં સાત સાવજો આવી ચડતા ગામલોકો થરથરી ઉઠ્યાં હતાં. ગામની આઠ ગાયોને શિકાર બનાવતા ખેડુતો ફફડી ઉઠ્યાં હતાં. આ બનાવની જાણ થતા વનવિભાગના આરએફઓ એ.વી.ઠાકર સહિતનો સ્ટાફ ઘટનાસ્થળે દોડી ગયો હતો અને મારણને જંગલમાં મુકી દેવાની કાર્યવાહી તેમજ ગાયોના માલિકની શોધખોળ આદરી હતી.

- વધુ એક ગાયનું મારણ

હજુ તો બુધવારની સવારે જ સાત ડાલામથ્થા સાવજોએ આઠ ગાયના મારણ કરતા લોકોમાં ફફડાટ ફેલાયો હતો. ત્યાં આજે સવારના સુમારે પણ વલ્લભભાઇ ગેડીયાની ગાયનું સિંહે મારણ કરતા તેઓએ વનવિભાગને જાણ કરી હોવાનું જાણવા મળેલ છે.